தமிழ்நாட்டின் தொன்மையான காவல் தெய்வ மரபு – பிடாரி அம்மன் வழிபாட்டின் வரலாறும் நம்பிக்கையும்

தமிழ்நாட்டின் தொன்மையான காவல் தெய்வ மரபு – பிடாரி அம்மன் வழிபாட்டின் வரலாறும் நம்பிக்கையும்

தமிழகம்:
தமிழ்நாட்டின் கிராமிய வாழ்க்கையோடு இரண்டறக் கலந்த தொன்மையான காவல் தெய்வங்களில் முதன்மையானவளாகப் போற்றப்படுபவள் பிடாரி அம்மன். மக்கள் சார்ந்த (Folk Tradition) அம்மன் வழிபாட்டு மரபில் ஆழமான செல்வாக்கைப் பெற்ற இந்த தெய்வம், கிராம எல்லைகள், விவசாய நிலங்கள் மற்றும் மக்களின் வாழ்வாதாரத்தை காக்கும் சக்தியாக நூற்றாண்டுகளாக வணங்கப்பட்டு வருகிறது.

வரலாற்று மற்றும் நாட்டார் வழிபாட்டு மரபுகளின்படி, பிடாரி அம்மன் கொடிய நோய்கள், தீய சக்திகள், பேரிடர்கள் மற்றும் பீடை போன்ற துன்பங்களிலிருந்து மக்களை பாதுகாக்கும் காவல் தெய்வமாக நம்பப்படுகிறது. இதனாலேயே, பழங்கால கிராம அமைப்புகளில் “ஊருக்கொரு பிடாரியும், ஏரிக்கொரு ஐயனாரும் வேண்டும்” என்ற வழக்கு வாக்கியம் உருவானதாக வரலாற்றாசிரியர்கள் குறிப்பிடுகின்றனர்.

புராணப் பின்னணி

சில புராணக் குறிப்புகளின்படி, பிடாரி அம்மன் சப்த மாதாக்களில் ஒருவரான சாமுண்டியின் ஒரு வடிவம் எனக் கருதப்படுகிறார். நாட்டார் வழக்கில் சொல்லப்படும் கதையின் படி, ஒருசமயம் சிவபெருமானின் சாபத்துக்கு ஆளான பார்வதிதேவி, நாககுலத்தில் பிறப்பெடுக்க வேண்டிய நிலைக்கு தள்ளப்பட்டதாக கூறப்படுகிறது.

நாகலோகத்தில் சிவனை நினைத்து நீண்ட காலம் தவம் செய்த ஓர் நாகக்கன்னியின் வயிற்றில் பார்வதிதேவி கருவுற்றதாகவும், அந்த நாகம் எட்டு முட்டைகள் இட்டு அடைகாத்ததாகவும் சொல்லப்படுகிறது. ஆடி மாதம் செவ்வாய்கிழமை, இராகு காலத்தில் அந்த எட்டு முட்டைகளும் உடைந்து அஷ்ட காளிகளாக தோன்றின என்றும், அதில் மூன்றாவது முட்டையிலிருந்து பிறந்தவளே முப்பிடாரி (பிடாரி அம்மன்) எனவும் நாட்டார் மரபு கூறுகிறது.

நாகலோகம் – தோஷ நிவாரண நம்பிக்கை

இந்த நாகலோக தொடர்பு காரணமாக, பிடாரி அம்மன் நாகதோஷம், செவ்வாய் தோஷம் ஆகியவற்றை நீக்கும் வல்லமை கொண்ட தெய்வமாக கிராமப்புறங்களில் நம்பப்படுகிறது. குறிப்பாக நாகதோஷத்தால் குழந்தைப் பாக்கியம் கிட்டாதவர்கள், பிடாரி அம்மனுக்கு பலி பூஜை (சேவல், ஆடு போன்றவை) செய்து, ஆலய வளாகத்தில் சமைத்து அறிமுகமில்லாதவர்களுக்கு பந்தி போட்டு உணவு வழங்க வேண்டும் என்ற வழிபாட்டு முறையும் பரவலாக கடைப்பிடிக்கப்படுகிறது.

இந்த வழிபாட்டில், உபயதாரர் குடும்பம் அந்த உணவை உண்ணக் கூடாது என்பதும், அவ்வாறு செய்தால் பலன் கிடைக்காது என்றும், மாறாக தோஷம் ஏற்படும் என்றும் நம்பப்படுகிறது. சரியான முறையில் வழிபட்டால், தோஷம் நீங்கி விரைவில் குழந்தைப் பாக்கியம் கிடைக்கும் என்பது கிராமங்களில் நிலவும் உறுதியான நம்பிக்கையாகும்.

பெயரின் பொருள் – மக்களின் துன்பம் நீக்கும் தாய்

‘பிடா’ என்பது துன்பம் என்பதைக் குறிக்கும் சொல்லாகும். மக்களின் துன்பங்களை நீக்குபவள் என்பதாலேயே இந்த தெய்வம் பிடாரி என அழைக்கப்படுவதாக மொழியியல் அறிஞர்கள் கூறுகின்றனர். எத்தகைய தீய சக்தியையும் எதிர்த்து நிற்கும் ஆற்றல் கொண்டவள் என்பதால், “யாருக்கும் அடங்காதவள் பிடாரி” எனவும் கிராமப்புறங்களில் வர்ணிக்கப்படுகிறாள்.

திருவிழாக்களும் வழிபாடும்

ஆடி மாதம் மற்றும் வைகாசி மாதங்களில் பிடாரி அம்மனுக்கு சிறப்புத் திருவிழாக்கள் நடைபெறுகின்றன.

• கூழ் வார்த்தல்
• பலி பூஜை

ஆகியவை பிடாரி அம்மனுக்கு மிகவும் உகந்த வழிபாடுகளாகக் கருதப்படுகின்றன. இன்றும் பல குடும்பங்கள் பிடாரி அம்மனை குலதெய்வமாக ஏற்று வழிபட்டு வருகின்றனர்.

நாட்டார் பாடல்களில் பிடாரி அம்மன்

பிடாரி அம்மனின் வீரமும் கருணையும் நாட்டார் பாடல்களில் உயிர்ப்புடன் வெளிப்படுகிறது.

“அரிவாளை ஏந்தி நின்று
எல்லை காக்கும் பிடாரி அம்மா
பீடை, பிணி ஓட்டும் தாயே
பேய் பயம் போக்கும் தாயே…”

எனத் தொடங்கும் பாடல்கள், மக்களின் வாழ்வில் பிடாரி அம்மன் எவ்வளவு நெருக்கமாக இணைந்திருக்கிறாள் என்பதை எடுத்துக் காட்டுகின்றன.

மரபும் வாழ்வும்

பழங்காலம் முதல் இன்றுவரை, கிராம சமூக அமைப்பின் பாதுகாப்பு அரணாக விளங்கும் பிடாரி அம்மன் வழிபாடு, தமிழர்களின் நாட்டார் மரபின் உயிர்நாடியாக தொடர்கிறது. காவல், கருணை, கடும் நீதியென பல முகங்களைக் கொண்ட இந்த தெய்வம், மக்கள் வாழ்வில் அச்சத்தையும் நம்பிக்கையையும் ஒருசேர தரும் சக்தியாகவே இன்றும் போற்றப்படுகிறாள்.

ஹரி ஓம் மஹா காளி! 🙏